يلّا نحب

حأفترض انو الحب بيحل مشاكلنا الذاتية والاسرية وأزماتنا كشعب

زمان إتربينا على انو الحب عيب..

الأهل بيحذروا بناتم المراهقات من الحب..

في المدرسة لو محَّايتك أو دفترك فيهو رسمة قلب كإنك ارتكبت جريمة..

البرامج الدينية بتتكلم عن الحب كأنه علاقة محرمة..

الدراما في تلفزيون السودان بتصور المصير الأسود لطالبات الجامعة البيحبوا زملاءهم..

"متذكرين النكتة بتاعت أنا مش حذرتك تبعد من الكافتيريا وأركان النقاش"

أستاذة اللغة العربية وأم فصلنا في الثانوي "أبلة باهية" دخلنا معاها في نقاش عن الحب في الشعر العربي القديم..

عن قيس وليلى، وجميل وبثينة..

لخصت النقاش انو حب زمان كان عفيف، وحب الزمن دة ما عفيف..

سألناها يعني شنو عفيف؟ 

وهي عرفت كيف انو زمان كان عفيف وهسة لا؟ مش احتمال الشعراء زمان كانوا ما بيقولو كل الكلام؟

واحدة مننا سألتها رأيها شنو في معلقة عمرو بن كلثوم..

في النهاية اتراجعت وقالت انو مافي حب عفيف؛ "وانتو يا بناتي ركزوا في القراية وعرسوا لمن يجيكم ولد الحلال"

لمن يقبلونا في الجامعة أول شي أهلنا بيحذرونا من الحب..

بيقولوا انو كذب، لعب بالعقول وضياع زمن..

بيبقى الحب في مخيلتنا هو الطريق للزواج..

الحب دايماً في حياتنا سر، مافي زول بيعرفوا..

عواطفنا بنخفيها، كأننا مجرمين..

بنتعلم على الكبت والقهر واحياناً الحياة المزدوجة بدرجة فصامية.

من الحاجات الجميلة والنادرة إنك تسمع كلمة "بحبك" بين افراد الاسرة..

أو انك تشوفهم بيحضنوا بعض (باستثناء مناسبات الفرح والترح)

الزوجة بيوصوها إنها ما تعبر عن حبها لزوجها (ان وجد الحب) عشان ما يقول عليها خفيفة

الزوج ما بيقول لزوجته "بحبك" لأنها بتبقى كلمة مستهلكة

اذا كنا مع أقرب الناس لينا ما بنقدر نوصل ليهم احاسيسنا الايجابية تجاهم

حنتواصل كيف "ايجابياً" مع مجتمعنا؟؟

اذا بنعرف حب الذات ب"الانانية"

حنقدر كيف نحب أي كائن تاني ونحن ما بنحب نفسنا؟؟

بتوقع انو يكون في فرضية الشهامة وإكرام الضيف والمسافر والغريب ووو...

وبعتبر انها فرضية ما صحيحة، لأنها مرتبطة بمظهرنا، "الناس يقولو علينا شنو لو" وشكلنا في المجتمع

بنهتم بالمادة وشكل وجودنا في المجتمع، أكتر من وجودنا في قلوب الناس

بالنسبة لي بعتبر الحب تحدي..

تحدي ذاتي واختبار انو الزول يتعامل مع التناقض بين مشاعروا وتنشئتوا كيف؟

فرصة للثورة على مفاهيم "الناس قالوا، حيقولو شنو والصاح شنو"

فرصة للحرية انك تحب منو وبأي طريقة؟

الحب وسيلة لتحقيق السكينة و السلام الداخلي والقدرة على المسامحة..

حيحصل شنو لو حبينا كل الناس..

مهما كان جنسهم أو لونهم أو لغتهم أو معتقدهم اذا ماجايينا منهم ضرر..

لو حبينا الناس في بلدنا وفي العالم، بدل ما نكره إثنية أو معتقد أو لون محدد..

لوحبينا الناس حنتحدى بيهم الظلم 

حنتحرر..

حنثور عشانهم ضد الانظمة البتشرع الظلم، لو كانت دولة، عادات وتقاليد، وأسرة..

حنهزم بيهم الانظمة المشوهة وحنكسب نفسنا كبني آدمين.

<3

حأختم بي بيت شعر لأبونا محجوب شريف "الما بيحب ما بحن ... والما بيحن جلّاد"

الحاصل شنو في الخرطوم؟

حأجاوب على السؤال دة من وجهة نظري المحضة "ما في جديد"

أبوكرشولا أبت تتحرر..

قوات الجبهة الثورية قرّبت على الخرطوم، وحذّرت المواطنين يبعدوا من الاهداف العسكرية..

الناس لسان حالها "الخرطوم كلها اهداف عسكرية نمشي وين يعني؟"

حكومة الكيزان جنّت جِن..

عبدالعزيز الحلو زي الكديسة بي سبعة أرواح، من 2011 لي هسة مات وحيا تلاتة مرات..

وزير الدفاع زعلان شديد، الجبهة الثورية كمّلت لحم غزلان كردفان كلُّه..

حتى وزير "الثروة الحيوانية" قال وزارتو جاهزة..

البلد في حالة استنفار، وقصة الجهاد دي بقت قديمة شديد..

يوم الاربعاء الفات "15/5/2013" البلد جاطت

عربات المطافي وعربات البوليس جارية في شوارع الخرطوم وبحري وامدرمان ومشغلة الصُفّارات..

ناس الخرطوم افتكرو في حريق، ما بعيد يكون في قصف ولا قنبلة في حتة..

ناس امدرمان قالو خلاص الجبهة الثورية دخلت الخرطوم بالذات بعد تحذير السفارة الامريكية لرعاياها من الذهاب لامدرمان "أصلو الامريكان ديل عارفين أي حاجة"

ناس بحري افتكروا انو في أحداث في الخرطوم أو امدرمان.

طلعت القصة استعراض قوة!!!

في شوارع الخرطوم ما في كردفان..

واتخلعوا بيها ناس الخرطوم.

يوم الاثنين  20/5/2013

جمعية القرآن الكريم عزمت الناس يجوا يدافعوا عن البلد بالدعاء تحت شعار "الدعاء سلاحنا"، وزي حركة استعراض القوة بتاع يوم الاربعاء، أكّد المؤمنيين انهم موجودين و خمسة ألف كمان "أنا أدعو اذاً أنا موجود"

 

والي الخرطوم حذّر من التظاهر غير القانوني وقال "تم رصد جهات بتسعى للتحريض على التظاهر بحجج المواصلات"

طبعاً المظاهرات حسمها ساهل ما زي تهديدات الجبهة الثورية..

المواصلات بعد ما تم تحويل جزء منها للموقف الجديد "شروني" بقت مافي..

الموقف بقى ساحة انتظار وتجمهر واحتمال "تظاهر"

الصورة من الفيسبوك صفحة I Love Omdurman

درجة الحرارة أكتر من 40 درجة مئوية، الناس بتضطر تمشي أكتر من 2 كيلو عشان تركب بص تاني..

رجال ونسوان كبار في السن وطلبة كلهم ماشين، كلهم مغلوبين على أمرهم، كلهم بيدعوا على الحكومة..

الصورة مأخوذة من الفيسبوك

أما الناشطين والناشطات ما بيدهم شي غير ياخدو صور في الموقف يرفعوها في مواقع التواصل الاجتماعي ويكتبو عن الحال..

الموية بتقطع والكهربا بتقطع والجنوب ضخ البترول عبر أراضينا والدولار لسة بيساوي ستة جنيه وخمسين قرش، واحتمال يرفعوا الدعم عن السلع "زي السنة الفاتت ، هو بيرفعوا كم مرة أصلو"

الأحزاب أغلبها ما سمعنا منها حاجة..
الصادق المهدي كالعادة "صرّح" وقال انو الجبهة الثورية كوّنوها العلمانيين، وهو/حزبه ما بيأيدها..

العلمانيين ديل فتروا زاتو لازم يتحشروا في أي شي؟؟؟

د.يوسف الكودة قال انو "حرب الحكومة ليست جهادية" 

كنت وين انت يا دكتور الكودة من زمان؟ الجهاد دة بيستنفروا ليهو من التسعينات، ولا دة كلو عشان حرموك من النوم ومنعوك من صلاة الجمعة في الوقت الفي معتقلين اتعذبوا واتضربوا وتمت اساءتهم.

ــــــــــــــــــــــــــــــــــــــــــــــــــــــــ

أنا مُصِرة على انو مافي جديد.

الحرب دي ليها سنين..

كانت في الجنوب، واتوسعت لي دارفور، جنوب كردفان والنيل الازرق..

بخجل أقول لا للحرب، في وقت ما عملت فيهو أي حاجة عشان يكون في سلام.

مافي سلام بدون عدالة، مافي عدالة بدون عدم تمييز.

الناس في الخرطوم، الساكنين بدون ما ينزحوا من حرب ولا الجوع ما فارقة معاهم البيحصل لأخوانهم في أقاليم تانية.

ببساطة لانهم ما حاسين انو ديل بني آدمين..

وديل مواطنين زيهم..

كانوا فرحانيين بالفيديو بتاع "طرد والي الخرطوم من عزاء شهيد أم دوم" ، وبسيطين اللاحظوا إنو الزول الطرد الوالي كان بيقول على الشهيد "لا دينكاوي،  لاشلكاوي دة ود عرب"

الناس في الخرطوم خايفة من الجبهة الثورية؛ وبتعتبر انو الحرب جابتها الجبهة الثورية

ما عندهم أي ظن انو الكيزان هم الجابو الحرب، لو ما الكيزان ما كان حتكون في جبهة ثورية..

ما عندهم أي احساس بالندم أو المرارة إنهم سكتوا ولسة ساكتين على المذابح.

مافي جديد

ــــــــــــــــــــــــــــــــــــــــــــــــــــــــــــــ